المهلبية

كوكو بنوتات 

اليوم نقدم ليكم واحد الديسير ساهل ماهل

كيعجب الكل و المقادير ديالو متواجدة فكل بيت

كنحتاجو المقادير التالية

واحد لتر حليب انا استعملت ساشي واحد ديال نيدو

خمسة معالق سنيدة

واحد ساشي فاني ايديال

ثلاثة معالق ماء زهر

خمسة معالق كبار نشا مايزينا

الطريقة

نديرو الحليب فوق البوطة نضيفو عليه السكر و مازهر و فاني نحركو شوية غير يبدا يسخن نضيفو مايزينا

و نحركو شوية بشوية حتى يعقاد الخليط و نصبوه فالزليفات  و ندخلوهم الثلاجة مدة جوج سوايع

و من بعد نزوقوهم باش بغينا

انا درت شوية الزبيب و الكركاع و الشكلاط

و بالصحة و الراحة

ممكن ديرو بودرة الكاكاو و طريفات الفريز و اللوز مهرمش

او بطريفات الموز و الكاوكاو مهرمش و بودرة الكاكاو

^_^

حلوى عيد الميلاد

سلام بنات اليوم جبت ليكم وصفة تحضير كعكة عيد الميلاد

 كنت شفتها فواحد الجروب و حبيت نجربها و نوجدها ليوم عيد ميلادي

و لان بزاف ديال البنات بغاو يعرفو كيف صايبتها فانا اليوم انحاول نوضح لكم بالصور المقادير و طريقة التحضير فهي سهلة جدا

المقادير 

2 كيسان طحين

2 كيسان سنيدة

1 كاس حليب

1 كاس زيت

7 بيضات

2 خمارات حمرين

2 خمارات فاني

كريم شونتي

بودرة الكاكاو

للتزيين

شكلاط محكوك

سيجار

فواكه معسلة

لوز مهرمش

الطريقة

كنفرقو بياض البيض على الاصفر

كنطربو صفر البيض مع سنيدة و الزيت و الحليب و فاني و الكاكاو كلهم كنضيفوهم بالتدريج و من بعد

نخلطو الطحين و الخمارات و نضيفوهم على الخليط الاول و نطربو مزيان حتى كلشي كيتجانس

نشدو بياض البيض و نزيدو عليه قبصة الملح و نطربو مزيان حتى يولي بحال الثلج

و شوية بشوية نضيفوه على الخليط الاول و نحركو بشي معلقة ديال السيليكون حتى يتجانس كلشي و نصبوه في لاطا مدهونة بالزبدة و مدردرة بشوية الطحين و ندخلوها الفرن

 نكونو شاعلين عليه غير التحت

من بعد نكونو دايرين الحليب و الانية اللي انوجدو فيها الكريم شونتي في الثلاجة باش تصدق لينا

نحضروها و نردوها للثلاجة باش تبرد شوية

من تطيب الكيكة نخرجوها غير تبرد شوية نقسموها في النص و نسقيوها بالسيرو اللي بغيتو

انا سقيتها غير بالمشروب ديال هاواي

و نبداو ندهنو الكريمة و نحطو الطبقة فوق منها و نغطيوها كاملة بالكريمة و نديرو اللوز مهرمش من الجوانب و الشكلاط محكوك من الفوق

من بعد كتجي مرحلة التزيين اللي كتكون على حسب الرغبة و حسب المواد المتوفرة بالبيت

و من الاحسن تبات الكيكة ليلة في الثلاجة باش تشرب و باش تبرد و تجي لذيذة في المذاق

و بصحتكم

شكرا على تتبعكم

كعكة الحلا بالفلان

هاي حبوباتي

 اليوم انا حضرت ليكم واحد الديسير ساهل ممكن اي وحده ديرو فالدار بالاضافة انه مكيحتاج مقادير بزاف

اذن نبداو على بركة الله مع المقادير

واحد لتر و نصف حليب 

ثلاث انواع الفلان بنكهات مختلفة فاني فريز و شوكولا

سكر سنيدة بمعدل ثلاث ملاعق كبار في كل نصف لتر

زوج بكيات سابلي

اولا نقطعو البسكوي قطع صغيرة

نحضرو الفلان الاول ديال الفاني

نسكبوه في الاناء و ندخلوه الثلاجة

من بعدما يبرد بواحد ساعتين نفرقو البسكوي فوق منو

 و نحضرو الفلان الثاني ديال الفريز و نسكبوه فوق اللي قبل منو

و ندخلوه حتى هو من بعد ذلك للثلاجة واحد ساعتين و نخرجوه عوتاني بنفس الطريقة ندردو عليه البسكوي

نحضرو الفلان الثالث ديال الشوكولا و نسكبوه فوق الكل و ندخلوه الثلاجة مدة ثلاث ساعات كاملة باش يجمد مزيان

من بعد الوقت الكافي نجبدوه و نحطوه  فصحن و نزينوه بالفاكهة اللي متوفرة

 و 

بالصحة و الراحة

^_^

الفقاص الحار

السلام عليكم

اليوم بغيت نقدم ليكم طريقتي الخاصة في تحضير الفقاص المالح و الحار و الطريقة جدا سهلة و المقادير في المتناول

نبداو مع المقادير

1 كيلو طحين

200 غرام زبدة مذوبة

نصف حك مطيشة

3 فرماجات كيري

 1 ضامة البقري

2 معالق لاموتارد

1 معلقة السودانية

ملعقة صغيرة ابزار

ملعقة صغيرة ملح

3 دروس ثومة

2 معالق خميرة العجين

كاس من الحجم الكبير ماء دافئ

الطريقة 

نخلطو المقادير كلها و نبداو نضيفو الطحين شوية بشوية و من بعد الماء الدافئ باش نجمعو بيه العجينة اللي خاصها تكون عجينة رطبة متماسكة و ممدقساش

 

و من بعد نخليوها تخمر مزيان

من بعد نبداو نديروها حرابل و نكونو من قبل شاعلين الفران و ناقصين عليه

  

من بعد ندخلوها للفران غير تصهد شوية و نخرجوها تبقى شوية رطبة باش يسهال تقطاع ديالها بالمقص

من بعدما خرجناها نخليوها غير شوية تبرد و نبداو نقطعوها بالمقص بشكل مائل و ندخلوها ثاني للفران تكمل طيابها

  

هذا هو الطبق النهائي و بالصحة و الراحة